Tha Comunn na Gàidhlig air iomairt ionmholta a stèidheachadh ann an co-bhonn le Outward Bound Loch Iall faisg air a’ Ghearasdan. Tha an iomairt seo ag amas air cùrsaichean fèin-leasachaidh a thairgse do sgoiltean, colaistean, oilthighean ’s buidhnean eile tro mheadhan na Gàidhlig.

Bidh luchd com-pàirtiche ag obair air diofar sgilean leithid conaltradh, co-obrachadh, ceannas, dèanamh cho-dhùnaidhean ’s dùbhlan pearsanta. ’S ann tro chleachdadh iomadach gnìomharan ’s tachartasan a bhios ionnsachadh a’ tachairt agus thèid gach tachartas ’s gnìomh a sgrùdadh as dèidh làimh leis a’ bhuidheann fhèin. Gu dearbh, tha na sgilean seo freagarrach ’s feumail taobh a-muigh na sgoile no colaiste ann an suidhichean-obrach ’s tha fhios gum bi luchd-fastaidh a’ coimhead air cùrsaichean lethid seo mar teisteanas pearsanta.

A bharrachd air misneachd ann an Gàidhlig, tha na cùrsaichean seo a’ toirt cothrom do sgoilearan beagan ionnsachaidh mun deidhinn fhèin ann an diofar shuidhichean agus cuideachd pàirt a ghabhail ann an cur-seachadan leithid sreap, campaich, Leum a’ pharaisiut, Loidhne-Oidhche, Seòladh-Ràtha. Tha e cudthromach cuideachd gum bi daoine a’ dèanamh a’ cheangail eadar spòrs ’s a’ Ghàidhlig nan ceann.

Tha na cùrsaichean air a bhith feumail ann an iomadach dòigh ach gu sònraichte dhan Ghàidhlig aca: comas-labhairt ’s misneachd sa chànan.

"Rinn sinn tòrr rudan a-muigh ann am buidheann agus chòrd e rium gu mòr"

"Chòrd a h-uile pàirt rium ach ’s dòcha gur e coiseachd-gorge, balach-sheòrais ’s na canoes na rudan ’s fheàrr leam fhèin. Bha iad uile dùbhlanach agus dìreach sgoinneil"

"Rinn mi adhartas oir a bha mi a’ bruidhinn ann an Gàidhlig fad na latha"

Tha Comhairle Lannraig a Tuath, Comhairle Pheairt ’s Ceann Rois, Sabhal Mòr Ostaig agus Fèisean nan Gàidheal am measg na buidhnean a ghabh pàirt san iomairt dhan ìre seo. Tha an iomairt a’ sìor fhàs agus thathar an dùil gun gabh barrachd Comhairlean ’s Colaistean pàirt san àm ri teachd.

Dòmhnall Morris
Fòn: 01463 234138
Post-d: domhnallmorris@cnag.org.uk