Cuairtean deireannach 2011 air fhoillseachadh

Seo a h-uile sgioba a bha an sàs sa chuairt deireannach aig Cuach na Cloinne 2009.

Tha am farpais ball-coise Cuach na Cloinne 2011, a th’ air a chuir air dòigh le Comunn na Gaidhlig, a’ gabhail àite ’s t-fhoghar, le na farpaisean roinneil gan cumail san t-Sultain agus na cuairtean deireannach san Dàmhair. Bidh sia farpaisean roinneil air an cumail an Steòrnabhagh, Lionacleit, Am Ploc, Inbhir Nis, an t-Òban, agus Glaschu leis an dà sgioba is fheàrr bho gach farpais roinneil a’ dol troimhe chun Cuairtean Deireannach sa Ghearasdan air 1 Dàmhair. Gu ruige seo, tha còrr air 40 sgioba, bho 30 sgoiltean, air cur a-staigh airson an fharpais, nam measg sgoiltean à Leòdhas, Uibhist, Barraigh, an t-Eilean Sgitheanach, Tiriodh agus Muile a thuilleadh air sgoiltean bho air feadh na Gàidhealtachd agus meadhan na h-Alba. Chaidh an fharpais, a th’ air a mhaoineachadh le Bòrd na Gàidhlig, Comhairle na Gàidhealtachd, Comhairle nan Eilean Siar agus MG ALBA, a chumail mu dheireadh an 2009 far na ghlèidh Bun-sgoil Ghàidhlig Ghlaschu an fharpais a’ dèanamh a’ chùis air Bun-sgoil Ghàidhlig Inbhir Nis sa chuairt dheireannach. Thuirt Dòmhnall MacNèill, Ceannard ChnaG,
“Tha sinn air ar dòigh leis na th’ air cur a-staigh airson an fharpais agus tha sinn a’ coimhead air adhart ri farpais air leth tarraingeach. Gu sònraichte, tha e na adhbhar thoileachas dhuinn gu bheil farpais roinneil againn an Earra-Ghàidheal airson a’ chiad uair. ’S e meadhan air leth math a th’ann am ball-coise, agus gu dearbha spòrs san fharsaingeachd, airson daoine òg a thoirt cruinn còmhla airson beagan spòrs is farpais, is caraidean às ùr a dhèanamh. Tha e cuideachd feumail dhan òigridh tuigse fhaighinn gu bheil a’ Ghàidhlig air a cleachdadh air feadh Alba, agus nach ann idir a-mhàin sna sgìrean sam bheil iad fhèin a’ fuireach. Tha sinn taingeil airson an luchd maoineachaidh airson an taic gus leigeil leinn an fharpais a chur air dòigh.

Tha liosta slàn de chinn latha is cuairtean an seo ann an cruth PDF.