2mh Dàmhair 2006

Air 5 Dàmhair ann an Sgoil Ghàidhlig Ghlaschu bithidh buidheann dheugairean le Gàidhlig a’ gabhail pàirt anns an deasbad eadar-nàiseanta Ghàidhlig 'Ri Chèile' a tha air a chur air dòigh gach bliadhna le Comunn na Gàidhlig ann an Alba agus Gael Linn ann an Èirinn.

Tha sgoilearan a’ tighinn bho dhiofar sgìrean ann an Èirinn còmhla ri sgoilearan bhon Ghearasdan, Cille Brìde an Ear, Glaschu, Inbhir Pheofharain, Port Righ agus Steòrnabhagh. A bharrachd air an Deasbad fhèin tha cuairt gu Gailearaidh Ealain agus Taigh Tasgaidh Kelvingrove agus oidhche shòisealta le aoigheachd bhon Phròbhaist aig Comhairle Baile Ghlaschu.

A rèir Sìne NicIlleathain bho Comunn na Gàidhlig tha a’ phròiseact cudromach ann a bhith a’ dèanamh ceangal eadar an dà choimhearsnachd cànain, agus mhìnich i "Chan e a-mhàin gu bheil na cuairtean seo a’ thoirt cothroman do dh' òigridh Ghàidhlig an cuid sgilean cànain a leasachadh troimh bhith ag ullachadh agus a’ gabhail pàirt anns an deasbad, a tha a’ gabhail a-staigh iomadach cuspair anns na naidheachdan, ach cuideachd tha e a’ toirt cothrom dhaibh measgachadh le deugairean ann an suidheachadh mion-chànain coltach riutha fhèin.

An lùib chuspairean na bliadhna seo, tha “cuiridh teacs às do chànan”, “cha bu choir ach daoine brèagha obair fhaighinn air Tbh”, “bu chòir Gàidhlig a bhith ga teagasg anns a’ h-uile sgoil ann an Alba”, agus “tha DJ’s gu math tàlantach air an rèidio”.